మహేష్ బాబు ఫ్యాన్స్ ఎప్పుడెప్పుడా అని ఎదురు చూస్తున్న సినిమా ‘సర్కారు వారి పాట’. చాలా రోజులుగా షూటింగ్ జరుపుకుంటున్న ఈ సినిమా నుంచి ఒక్కొక్కటిగా వస్తున్న అన్ని అప్‌డేట్స్ సూపర్ స్టార్ అభిమానులను హుషారెత్తిస్తున్నాయి. అయితే మూవీ సాంగ్స్ విషయంలో కాస్త ఆలస్యం చేసిన చిత్రయూనిట్.. రీసెంట్‌గా మొదటి సాంగ్ ‘కళావతి’ రిలీజ్ చేశారు. ఈ పాటకు సోషల్ మీడియాలో సూపర్ రెస్పాన్స్ వస్తోంది. ఈ నేపథ్యంలో తాజాగా ఈ సినిమాలో మహేష్ బాబు రోల్ విషయమై ఆసక్తికర విషయాలు చెప్పారు లిరిసిస్ట్ అనంత శ్రీరామ్.
గీత గోవిందం ఫేమ్ పరశురామ్ దర్శకత్వంలో రూపొందుతున్న ఈ సినిమాలో మహేష్ బాబు- కీర్తి సురేష్ జంటగా నటిస్తున్నారు. బ్యాంకింగ్ మోసాల నేపథ్యంలో ఈ సినిమా కథ ఉంటుందని విన్నాం. ఇందులో మహేష్ డిఫరెంట్ రోల్ పోషిస్తున్నారనే టాక్ నడుస్తోంది. దీనికి తోడు గతంలో వదిలిన మహేష్ లుక్‌లో మెడ భాగంలో రుపాయి బిళ్ల టాటూ కనిపించడంతో మహేష్ క్యారెక్టర్ ఎలా ఉంటుందనే క్యూరియాసిటీ జనాల్లో నెలకొంది. ఈ క్రమంలో అనంత శ్రీరామ్ చెప్పిన కొన్ని విషయాలు సినిమాపై మరింత ఆసక్తి రేకెత్తిస్తున్నాయి.
సోషల్ మీడియాలో కళావతి పాట భారీగా వ్యూస్‌ రాబడుతూ ట్రెండ్ అవుతున్న నేపథ్యంలో ఈ పాటకు లిరిక్స్ రాసిన అనంత శ్రీరామ్‌తో పలు మీడియా సంస్థలు ఇంటర్వ్యూలు తీసుకుంటున్నాయి. ఈ క్రమంలో ఓ ఇంటర్వ్యూలో మాట్లాడుతూ ఈ సినిమాలో మహేష్ బాబు రోల్ ఎలా ఉంటుందో రివీల్ చేశారు. ఎవరూ లేని అనాధగా పెరిగిన వ్యక్తిగా, ఓ మొండివాడిగా మహేష్ కనిపిస్తారని.. జీవితంలో అసలు అమ్మాయి వాసన కూడా తెలియని వ్యక్తిగా కనిపించి ఆ తర్వాత ప్రేమలో పడతారని అనంత శ్రీరామ్ చెప్పుకొచ్చారు. ఎప్పుడు చూసినా గొడవలు, కొట్లాటలలో ఉండే వ్యక్తి ప్రేమలో పడితే ఆ ప్రేమను ఏ విధంగా వ్యక్త పరుస్తాడనే ఆలోచనలో ఈ సాంగ్ రాయడం జరిగిందని ఆయన చెప్పారు.
