Team India: టీమిండియా వరల్డ్ కప్ గెలిచి సుమారు దశాబ్దకాలం అయ్యింది. ఎంఎస్ ధోని సారథ్యంలోని టీమిండియా 2011లో వన్డే వరల్డ్కప్ నెగ్గిన విషయం తెలిసిందే. తర్వాత అన్ని ఐసీసీ ట్రోఫీల్లో భారత్ విఫలమవుతూ వస్తోంది. ఐసీసీ ఛాంపియన్స్ ట్రోఫీ శ్రీలంక గెలుచుకున్న విషయం తెలిసిందే. మరోవైపు టీ20 వరల్డ్ కప్లలోనూ టీమిండియా విఫలమవుతూ వస్తోంది.
ఇక 2019 వన్డే వరల్డ్ కప్లోనూ సెమీస్లో భారత్ పరాజయం పాలై ఇంటిదారి పట్టింది. ఆ మ్యాచ్లో ఎంఎస్ ధోని రనౌట్ కావడంతో అభిమానులు కంటతడి పెట్టుకున్నారు. క్రికెట్ను అంతలా ఇష్టపడతారు భారత అభిమానులు. ఈ క్రమంలో ప్రస్తుతం వచ్చే వన్డే వరల్డ్ కప్ నెగ్గాలని టీమిండియా ఇప్పటి నుంచే ప్రణాళికలు రూపొందిస్తోంది. 2023లో జరిగే మెగా టోర్నీలో ఎలాగైనా కప్పును ముద్దాడాలని చూస్తోంది భారత్.
భారత మాజీ క్రికెటర్, దిగ్గజ ఆటగాడు సునీల్ గవాస్కర్ తాజాగా కీలక వ్యాఖ్యలు చేశాడు. వచ్చే వన్డే వరల్డ్ కప్ను మనం గెలవాలాంటే రెస్ట్ అనే పదం మర్చిపోవాలని సూచించాడు. ఆటగాళ్లతోపాటు బీసీసీఐ కూడా విశ్రాంతిని మర్చిపోవాలని సూచించాడు. ఈ మెగా టోర్నీ పూర్తయ్యే వరకు ఆటగాళ్లకు విశ్రాంతి ఇవ్వకుండా వరుసగా ఆడించాలని బీసీసీఐకి హితవు పలికాడు గవాస్కర్.
Team India: అలా చేస్తేనే జట్టు స్ట్రాంగ్ అవుతుంది..
అన్ని సిరీస్లలోనూ ఒకే రకమైన జట్టుతో బరిలోకి దిగితే మంచి ఫలితాలుంటాయని అభిప్రాయపడ్డాడు సునీల్ గవాస్కర్. అప్పుడు ఒక జట్టు చాలా స్ట్రాంగ్గా అవతరిస్తుందని చెప్పాడు. తీరికలేని షెడ్యూల్ కారణంగా ఆటగాళ్లపై ఎక్కువ పని భారం పడకూడదనే నెపంతో బీసీసీఐ రొటేషన్ పద్దతిని అవలంభిస్తోందని, ఇలాంటి పద్ధతిని మార్చాలని గవాస్కర్ చెప్పాడు. ఆటగాళ్లు గాయాల బారిన పడకుండా చూసుకోవాలని, కానీ వన్డే వరల్డ్కప్ నెగ్గాలంటే కఠిన నిర్ణయాలు తీసుకోవాలని సూచించాడు.